ტომ კრუზის ჰონორარის საკითხმა “შეუსრულებელი მისიის” გადაღებები გაყინა!

ახალ მისიაზე მუშაობა გასული წლის ივლისში დაიწყო, სანამ “შეუსრულებელი მისიის” მეხუთე ფილმი გამოვიდოდა ეკრანებზე. მეხუთე მისიამ საბოლოო ჯამში 682 მილიონი დოლარი დააგროვა 150 მილიონიანი ბიუეტის პირობებში და Paramount-მა განაცხადა, რომ მეექვსე ფილმში რეჟისორ კრისტოფერ მაკკუორისთან გააგრძელებდა მუშაობას. ფილმის ისტორიაში ეს იქნება პირველი შემთხვევა, როცა ექვს ნაწილიანი საგის ორ ფილმს ერთი და იგივე რეჟისორი გადაიღებს. კომპანიამ ლონდონში 15 ადამიანი დაიქირავა ფილმის პრეპროდაქშენისთვის და დაიწყო ვიზუალური ეფექტების დიზაინზე მუშაობა. მაგრამ ახლა ინსაიდერები იტყობინებიან, რომ ფილმზე მუშაობა შეჩერებულია და ის არ აღდგება, სანამ სტუდიის ხელმძღვანელები მთავარი როლის შემსრულებელთან ჰონორარის ოდენობაზე არ მოილაპარაკებენ.

ერთ-ერთი ვერსიით Paramount ჰონორარს არა მხოლოდ ტომ კრუზს, არამედ პროდიუსერებსაც უმცირებს. სხვა ვერსიით ტომ კრუზი სტუდიისგან ისეთივე გულუხვ ჯილდოს ითხოვს, როგორიც მას Universal-მა შესთავაზა “მუმიისთვის”, Paramount კი თანახმაა მხოლოდ იმდენი გადაუხადოს, რაც წინა ფილმში მისცა. სტუდიას მოუწევს ჰონორართან დაკავშირებული საკითხის გადაწყვეტა, რათა მომავალ წელს “მისიის” მეექვსე ნაწილი გამოუშვას. სურათის წარმოება იანვრამდე მაინც არ დაიწყება, რადგან ამ მომენტში ფილმის სცენარი იწერება, კრუზი კი “მუმიას” გადაღებებითაა დაკავებული.