რატომ თქვა უარი ჯორჯ მილერმა ”აკირას” ეკრანიზაციაზე

”შეშლილი მაქსის” შემქმნელი, ჯორჯ მილერი, როგორც ჩანს პოსტაპოკალიპტური სამყაროსგან კარგა ხნით აპირებს ტაიმ-აუტის აღებას. სულ ცოტა ხნის წინ გაირკვა, რომ რეჟისორმა უარი თქვა კომპანია Warner Bros. წინადადებაზე, გადაეღო იაპონური საკულტო მანგის და ანიმეს, ”აკირას” ეკრანიზაცია. მილერის თქმით, მას უამრავი შეთავაზება აქვს, მაგრამ სამწუხაროდ, დრო ყველაფრისთვის არ ჰყოფნის. რეჟისორმა ასევე უარყო ხმები იმის შესახებ, რომ თავის დროზე ”მაქსის” შექმნაზე გავლენა აღნიშნულმა ანიმემ მოახდინა. მისი განცხადებით, გაუგებარია საერთოდ საიდან წამოვიდა შედარების საფუძველი. მილერი ასევე აღიარებს, რომ ანიმეს დიდი ფანია, იმის მიუხედავად რომ, მანგა არ წაუკითხავს. ”აკირას” მრავალტანჯული ეკრანიზაციის თემა უკვე რამდენიმე წელია, წელიწადში ერთხელ მაინც წამოიწევა, თუმცა საშველი არა და არ დაადგა. უკანასკნელი ინფორმაცია, რაც ფილმის შესახებ გავრცელდა, ისაა, რომ სცენარს მარკო რამირესი წერს (Daredvil, Sons of Anarchy). პროექტს ასევე აქტიურად უკავშირებენ კრისტოფერ ნოლანის სახელს, თუმცა უცნობია, რეჟისორის თუ პროდიუსერის რანგში.