ტრანსფორმერები ზედმეტი არასდროს არის

ყოველ შემთხვევაში, ასე ფიქრობენ Hasbro-ში, სადაც ტრანსფორმერების ფრენშაიზის მთელი ათი წლით გაგრძელება გადაწყდა. რაც თავის მხრივ, მინიმუმ კიდევ ოთხი ფილმის გამოსვლას ნიშნავს. ჰასბრომ რობოტების მომავალი გამოცდილ სცენარისტებს მიანდო, მათ შორის: კენ ნოლანი (Black Hawk Down), რობერტ კირკმანი (The Walking Dead), ზაკ პენი (The Avengers), ჯეფ პინკნერი (Amazing Spider-Man 2), სტივენ დენაითი (Spartacus, Daredevil), აკივა გოლდსმანი (Batman and Robin). თუ გავითვალისწინებთ ტრანსფორმერების ფილმების შემოსავლიანობას, გასაკვირი ნამდვილად არ არის, რატომ იქნა ასეთი გადაწყვეტილება მიღებული. ფრენშაიზის ბოლო ორმა ფილმმა, Transformers: Dark of the Moon და Transformers: Age of Extinction, მსოფლიო კინოგაქირავებაში თითოეულმა მილიარდზე მეტი მოაგროვა. გარდა ამისა, ტრადიციულად შესანიშნავი კასტი და უმაღლესი დონის სპეცეფექტები იდეალური საზაფხულო ბლოკბასტერის მასალაა. რაც შეეხება მეხუთე ტრანსფორმერებს, ჰასბროს პრეზიდენტმა სტივენ დევისმა დაადასტურა, რომ მაიკლ ბეი მასზე უკვე მუშაობს.