ევა გრინის კიდევ ერთი უარყოფითი როლი!
როგორც უკვე იცით ცნობილი Wonder Woman-ის შესახებ ფილმს იღებენ და მასში მთავარ როლებს გალ გადოტი და კრის პაინი ასრულებენ. ცოტა ხნის წინ ცნობილი გახდა, რომ ფილმში მთავარი ბოროტმოქმედების როლებზე ევა გრინი და შონ ბინი მოიაზრებიან, მათ შეთავაზება უკვე მიიღეს, თუმცა პასუხი ჯერ ცნობილი არ არის. თანხმობის შემთხვევაში შონ ბინი ომის ღმერთის არესის როლს, ხოლო ევა გრინი კირკეს როლს მოირგებს. ბერძნული მითოლოგიის მიხედვით კირკე ჰელიოსისა და პერსეს ასულია, რომელიც უძლიერესი ჯადოქარი გახდა. კომპანია Warner Bros. 
არ ახმაურებს ქასთინგის დეტალებს, ამიტომ არ ვიცით რამდენად სარწმუნოა ეს ინფორმაცია, მაგრამ რადგანაც ფილმის გადაღებები 2015 წლის ნოემბერში ლონდონში იწყება, მსახიობთა სია უკვე მალე უნდა იყოს მზად. ახალი სუპერგმირული სურათის რეჟისორი პეტი ჯენკინსი იქნება. ფილმის მსოფლიო პრემიერა 2017 წლის 23 ივნისისათვის იგეგმება.