დოკუმენტური ფილმი კრიშტიანუ რონალდუზე

ფეხბურთის ვარსკვლავმა კრიშტიანუ რონალდუმ დაადასტურა, რომ მასზე დოკუმენტური ფილმის ნახვის საშუალება გვექნება სახელწოდებით “რონალდუ”. რონალდუმ, რომელიც მადრიდის “რეალში” თამაშობს, სიახლე “ტვიტერზე” დაწერა. ფილმი უკვე წარმოებულია და მისთვის “ფეისბუქზე” და “ტვიტერზე” შექმნილია ოფიციალური გვერდები. მათზე დაყრდნობით, ფილმი მსოფლიო ფეხბურთის ერთ-ერთი ყველაზე წარმატებული ვარსკვლავის ერთ წელიწადზე მოგვითხრობს. ფილმის რეჟისორი ბრიტანელი ენტონი უონკია, რომელმაც BAFTA მოიგო სერიალისთვის “კოშკი: ორი ქალაქის ზღაპარი”. ფილმის გავრცელებაზე Universal Pictures-ი იზრუნებს. “რონალდუს” გადაღებები მიმდინარეობდა მადრიდში, ლისაბონში, მადეირაში, ბრაზილიასა და ამერიკის შეერთებულ შტატებში. პროდუსერი პოლ მარტინია We Came We Saw We Conquered Studios-იდან, ხოლო აღმასრულებელი პროდუსერები – ჯეიმს გეი-რიზი და ასიფ კაპადია On the Corner Films-იდან. დოკუმენტური ფილმი კინოთეატრებში შემოდგომაზე გამოჩნდება.