ცნობილია ადამ სენდლერისა და Netflix-ის პირველი ფილმის დეტალები!

რამდენიმე თვის წინ ცნობილი გახდა, რომ ადამ სენდლერმა Netflix-თან ოთხფილმიანი კონტრაქტი გააფორმა. ეს ნიშნავს იმას, რომ მსახიობისა და არხის თანამშრომლობით შექმნილ მინიმუმ ოთხ ახალ სურათს ვიხილავთ! ამბობდნენ, რომ ეს სენდლერის კარიერაში ნამდვილი გამობრწყინება იქნებოდა, თუმცა იმასაც ამბობდნენ, Netflix-ი ადამს საშუალებას არ მისცემს, ფილმები “თავისებურად გააფუჭოს” და ყველაფერი სწორედაც რომ არხის დამსახურება იქნებაო. როგორც არ უნდა იყოს, რამდენიმე საათის წინ ახალი ამბავი გავიგეთ: ერთობლივი ძალებით შექმნილ პირველ ნამუშევარს “სასაცილო ექვსეული” ერქმევა! The Wrap-ის ინფორმაციით, ახალი სურათი Sony-სა და Paramount-ის დახმარებით შეიქმნა. გამოვლინდა მონაწილე მსახიობთა სიაც. ვესტერნის ჟანრის “სასაცილო ექვსეულში” ტეილორ ლოტნერი, ნიკ ნოლტი, ბლეიკ შელტონი, უიტნი კამინგსი, სტივ ბუშემი, რობ შნაიდერი, დენ აიკროიდი, უილ ფორტი, ნიკ სუარდსონი, ტერი კრიუსი, ჯონ ლოვიტზი, ვანილა აისი, ლუკ უილსონი, სტივ ზენი, დენი ტრეჰო, ქრის პარნელი და ლეიველ კროუფორდი მიიღებენ მონაწილეობას. ფილმის სცენარი თავად სენდლერსა და ტიმ ჰერლის ეკუთვნით. რეჟისორის ვინაობა ჯერჯერობით უცნობია. გადაღებები მომდევნო თვეში დაიწყება.