“ჰობიტის” საერთაშორისო პრემიერა დღეს პირდაპირ ეთერში გადაიცემა!

პირველ დეკემბერს პიტერ ჯეკსონის ნამუშევრის “ჰობიტი: ხუთი არმიის შერკინება” ლონდონური პრემიერა პირდაპირ ეთერში გადაიცემა. ინტერნეტის საშუალებით, მაყურებელი თვალს მიადევნებს წითელ ხალიჩაზე მისულ შემოქმედებით ჯგუფს. პრემიერა განსაკუთრებული იმიტომაცაა, რომ ის “ჰობიტის” ტრილოგიაში უკანასკნელია. გარდა ამისა, მისი ხანგრძლივობა “ჰობიტისა” და “ბეჭდების მბრძანებლის” ყველა ნაწილს ჩამოუვარდება. ფილმი მხოლოდ 144 წუთს გასტანს. აქედან 45 წუთის განმავლობაში ხუთი არმიის შერკინებას გვიჩვენებენ. როგორც ამბობენ, ეს სცენა განსაკუთრებით საინტერესო და მრავალფეროვანი იქნება და თითოეულ მაყურებელზე წარუშლელ შთაბეჭდილებას დატოვებს. შეგახსენებთ, რომ ახალ ნამუშევარში მთავარ როლებს იან მაქკელენი, მარტინ ფრიმენი, ბენედიქტ კამბერბეტჩი, ლუკ ევანსი, ევანჯელინ ლილი, კეიტ ბლანშეტი, ორლანდო ბლუმი და რიჩარდ არმიტაჯი ასრულებენ. ფილმის სცენარი ფრენ უოლშს, ფილიპა ბოიენსს, პიტერ ჯეკსონსა და გილერმო დელ-ტოროს ეკუთვნით. “ჰობიტი: ხუთი არმიის შერკინება” კინოთეატრებში 17 დეკემბერს გამოდის! მსოფლიო პრემიერის პირდაპირი ეთერი კი ზუსტად 8 საათში გადმოიცემა.