შეილინ ვუდლი ახალ ბიოგრაფიულ სურათში ითამაშებს!

შეილინ ვუდლი ოლივერ სტოუნის ახალ ფილმში მონაწილეობისათვის ემზადება. მსახიობი ქალის მთავარ როლზე აწარმოებს მოლაპარაკებას. სურათი ედუარდ სნოუდენის ბიოგრაფიას ეფუძნება. ის ერთგვარი ეკრანიზაციაა ლუკ ჰარდინგის წიგნისა “სნოუდენის ფაილები” და ანატოლი კუჩერენას ნამუშევრისა “ოკტოპუსის დრო”. მთავარ პერსონაჟს ჯოზეფ გორდონ-ლევიტი განასახიერებს. გოგონა ფილმიდან “ბედის ვარსკვლავის ბრალია” კი მისი შეყვარებული იქნება. ახალ სურათზე მუშაობა იანვარში დაიწყება. პირველი გაჩერება გერმანიაშია დაგეგმილი. ჯერჯერობით უცნობია სიუჟეტის ზუსტი შინაარსი, მაგრამ, ნაწერებიდან თუ ვიმსჯელებთ, ამბავი გაჰყვება სნოუდენის თავგადასავლებითა და საფრთხით სავსე მოგზაურობას ჰავაიდან ჰონგ-კონგამდე და მოსკოვისაკენ. შეილინ ვუდლის კარიერა 2013 წლიდან წინ და წინ მიიწევს. წელს მისმა ფილმებმა “ბედის ვარსკვლავის ბრალია” და “დაივერჯენტი” უდიდესი გამოხმაურება და კრიტიკოსების დადებითი შეფასებები დაიმსახურა. როგორც ცოტა ხნის წინ გაცნობეთ, მსახიობი უკვე მუშაობს სურათზე “მეამბოხე”, რომლის პრემიერაც 2015 წლის 20 მარტსაა დაგეგმილი.