უოსკარო მსახიობის საოსკარო როლები – ლეონარდო დიკაპრიო

ბავშვობაში, ყველა გოგოსთვის საოცნებო და ბევრი ბიჭისთვის მისაბაძი, დღეს კი ერთ-ერთი უნიჭიერესი, სიმპათიური, ძვირადღირებული, თუმცა უოსკარო მსახიობის ლეონარდო (ვილჰელმ) დიკაპრიოს დაბადების დღეა. ვარსკვლავს 40 წელი შეუსრულდა. დიკაპრიომ სამსახიობო კარიერა ადრეულ 90-იანებში სატელევიზიო სერიალიდან დაიწყო. მისი სადებიუტო ფილმი რობერტ დე ნიროსთან ერთად ნათამაშევი This Boy’s Life (1993) იყო. ჯეიმს კამერონის „ტიტანიკამდე“ დიკაპრიომ ითამაშა რამდენიმე ფილმში, რომელიც მის სავიზიტო ბარათად იქცა. ეს ფილმები იყო What’s Eating Gilbert Grape (1993), The Basketball Diaries (1995) და Romeo + Juliet (1996).

ლეონარდო დიკაპრიოს შეუძლია შექმნას პერსონაჟის ხასიათი და ქცევა, რომელსაც შემდგომში ბევრი მსახიობი მიბაძავს. 90-იანებსა და ადრეულ 2000-იანებში ნათამაშევი მისი როლები სწორედ ასე შეიძლება დახასიათდეს. მოგვიანებით კი დიკაპრიო იძენს ასაკისთვის დამახასიათებელ გამოცდილებასა და მეტ პრაქტიკულ ცოდნას, რაც აშკარად ეხმარება უფრო და უფრო კარგი პერსონაჟების შექმნაში. ჩემთვის დიკაპრიო, როგორც პიროვნება დასაფასებელია მისი გარემოსადმი დამოკიდებულების გამოც (ტომ იორკის შემდეგ, მეორე ადგილზეა ჩემთვის). 2014 წლის ოქტომბერში დიკაპრიო მიწვეული იყო კლიმატის სამიტზე, სადაც მის მიერ წარმოთქმულმა სიტყვამ, ბევრი გარემოსდამცველი აღაფრთოვანა. “როგორც მსახიობი, მე თავის მოჩვენებით ვირჩენ თავს. მე ფიქტიურ პერსონაჟებს ვთამაშობ, რომლებიც ხშირად არარსებულ პრობლემებს წყვეტენ. ვფიქრობ, რომ კაცობრიობა კლიმატურ ცვლილებებს უყურებს, როგორც თავის სამუშაოს: თითქოს ეს ფიქციაა. ყოველდღიურად ვხედავთ ახალ კლიმატურ მოვლენებს, რომელთა უარყოფა შეუძლებელია. ჩვენ მომსწრენი ვართ ამინდის ექსტრემალური ცვლილების, ყინულოვანი მასა ანტარქტიდაში გაუგონარი სისწრაფით დნება და ათწლობით უსწრებს მეცნიერულ პროგნოზებს. ეს არ არის დემაგოგია და ისტერია, ეს არის ფაქტი… პატივცემულო დელეგატებო, მსოფლიოს ლიდერებო! მე თავის მოკატუნებით ვირჩენ თავს, მაგრამ თქვენ არა. ახლა თქვენი რიგია, გასცეთ პასუხი კაცობრიობის ყველაზე უდიდეს გამოწვევას. ჩვენ გთხოვთ, ამას ღირსეულად შეხვდეთ”, – განაცხადა დიკაპრიომ. სამიტის მიმდინარეობისას, დიკაპრიო კლიმატური ცვლილებების წინააღმდეგ გამართულ აქციასაც შეუერთდა. დიკაპრიოს გვერდით, აქციაზე გაეროს გენერალური მდივანი ბან გი მუნიც იდგა. გაეროს გენერალურმა მდივანმა ლეონარდო დიკაპრიო გაერო-ს მშვიდობის ელჩად დაასახელა და მას “ახალი ხმა კლიმატის დაცვაში” უწოდა.



ბევრისთვის საინტერესოა მსახიობის პოლიტიკური ხედვებიც. ის 2008 წელს ბარაქ ობამას საპრეზიდენტო საარჩევნო კამპანიას უჭერდა მხარს. მსახიობი დადიოდა მოსახლეობასთან დიდ შეხვედრებზე და საუბრობდა ბუშის ადმინისტრაციის მიერ დაშვებულ შეცდომებზე. რამდენიმე კვირის წინ, ლეონარდო დიკაპრიომ კინოკარიერაზე დროებით უარი თქვა და „შესვენება გამოიცხადა“. რეჟისორი დევიფ ფინჩერი მას სტივ ჯობსის როლზე მოიაზრებდა. მოლაპარაკებებიც დაწყებული იყო, თუმცა მოულოდნელად დიკაპრიომ ბიოგრაფიულ ფილმში თამაშზეც უარი განაცხადა.



1. What’s Eating Gilbert Grape (1994) – ძალიან ახალგაზრდა ლეონარდო დიკაპრიო ჯონი დეპტან ერთად მთავარ როლს ასრულებს ფილმში „რა აწუხებს გილბერტ გრეიფს?“ ჯერ კიდევ გამოუცდელმა დიკაპრიომ არაჩვეულებრივად შეასრულა განსაკუთრებული საჭიროებების მქონე თინეიჯერის როლი, რომელიც ბიპოლარულია და მუდმივ ეიფორიაშია. როგორც დიკაპრიო ინტერვიუებში ამბობს, მისთვის ეს პერსონაჟი მარტივი სათამაშო იყო, თუმცა უკვე ასაკში შესული ლეონარდო ამ როლს სრულებით საპირისპიროდ უყურებს და ამბობს, რომ ეს მართლაც რთული სათამაშო იყო და ამ სირთულის დაძლევა მხოლოდ იმიტომ შეძლო, რომ მაშინ თვითონაც თინეიჯერი იყო. ლეონარდო დიკაპრიომ შესრულებული როლისთვის „Best Supporting Actor“-ის ჯილდო მიიღო.
2. The Basketball Diaries – (1995) – 90-იანი წლების ქრონიკა. განსგტერები, ნარკოტიკები და ყველა ატრიბუტიკა დამახასიათებელი ამ წლების ნიუ იორკისთვის. დიკაპრიოს პერსონაჟი ჯიმ ქეროლი ჰეროინზე დამოკიდებული ახალგაზრდაა, რომელიც შემდგომი დოზისთვის მზად არის იქურდოს, ცემოს, მოკლას. დიკაპრიო მშვენივრად იყენებს “What’s eating Gilbert Grape” -ში შეძენილ სამსახიობო ცოდნას და კინოინდუსტრიაში ქმნის ნარკოდამოკიდებულის მისეულ სახეს, რომლისთვისაც შემდგომში ბევრ მსახიობს მიუბაძავს.
3. TITANIC (1997) – უამრავი მაისური, კეპი, პოსტერი, რვეული, კალამი და ა.შ. TITANIC-ის პოსტერის გამოსახულებით, ალბათ ერთ-ერთი იმ ბრენდთაგანია, რომელიც მსოფლიოში დიდი რაოდენობით გაიყიდა. ფილმი ოსკარის 14 ნომინაციაზე იყო წარდგენილი, თუმცა არცერთი მათგანი არ ყოფილა საუკეთესო მსახიობის ნომინაცია. დიკაპრიოს ახალგაზრდული შარმი ჯილდოს გარეშე დარჩა.
4. Gangs of New York (2002) – დიკაპრიოს პირველმა კოლაბორაციამ მარტინ სკორსეზესთან, ფილმს უამრავი ნომინაცია მოუტანა, თუმცა ლეონარდოს როლი კვლავ „შეუმჩნეველი“ და ჯილდოს გარეშე დარჩა. მე-19 საუკუნის შურისმაძიებელი განგსტერის პერსონაჟი აბსოლუტურად განსხვავდებოდა მის მიერ მანამდე ნათამაშევი გმირებისგან. ამ ფაქტმა ლეონარდოს კიდევ ერთი კინოსახე გამოაჩინა. მსახიობი ინტერვიუებში ამბობდა, რომ სკორსეზესთან ერთად მუშაობა მისთვის ძალიან მნიშვნელოვანი იყო. ეს შემდგომშიც დადასტურდა, რადგან დიკაპრიომ სკორსეზეს კიდევ რამდენიმე ფილმში ითამაშა.
5. Catch Me If You Can (2002) – დიკაპრიოს ერთ-ერთი რეიტინგული ფილმი. ფილმი გამოსვლის დროს Box Office-ს ჰიტი იყო. რეიტინგი ბევრისთვის მოულოდნელი აღმოჩნდა, რადგან იმ პერიოდში ჯერ კიდევ უამრავი, მილიონობით მაყურებლისთვის, დიკაპრიოს მიერ ნათამაშევი ჯეკ დოუსონის როლი ყველაზე საყვარელი იყო.
6. The Aviator (2004) – მარტინ სკორსეზესა და ლეონარდო დიკაპრიოს მეორე კოლაბორაცია. დიკაპრიომ მართლაც რომ ამაღლებული ბიოგრაფიული პორტრეტი შექმნა.
7. The Departed (2006) – სკორსეზეს კიდევ ერთი ფილმი და დიკაპრიოს მიერ შექმნილი პარანოიკის როლი.
8. Inception (2010)- ტვინის ამრევი ფილმი. ფაზლი, რომელიც მეორედ ნახვის შემდეგ დავალაგე ქრისტოფერ ნოლანის სცენარისა და რეჟისორობით გადაღებული ფილმია. კობის ჩავარდნა დეპრესიაში და პარანოიის „აკიდება“, მისი სურვილი ნახოს შვილები, იმდენად რეალურად იყო ნათამაშევი, რომ მეგონა უცხო ადამიანის რეალურ ცხოვრებას ვუყურებდი.
9. Shutter Island (2010) – მეორე მსოფლიო ომის ვეტერანის როლი დიკაპრიოსთვის ყველაზე დამთრგუნველი და მძიმე იყო. ამას თვითონ მსახიობი ამბობს. „ეს როლი ჩემთვის ყველაზე დიდი გამოწვევა იყო, როგორც ფსიქოლოგიურად, ასევე ემოციურად“.
10. Django Unchained (2012) – კუენტინ ტარანტინომ მონათმფლობელ კელვინ ქენდის როლისთვის ლეონარდო დიკაპრიო შეარჩია და არც შემცდარა. დიკაპრიომ არაჩვეულებრივად ითამაშა და შეინარჩუნა მოწოდების ის სიმაღლე, რაზეც აქამდე იყო. ბევრი იმასაც ამბობდა, რომ ამ ფილმში ოსკარსაც აიღებდა, თუმცა…
11. The Wolf of Wall Street (2013) – დიკაპრიო მარტინ სკორსეზესთან მუშაობაზე სურვილსა და თანხმობას უკვე მეხუთედ სწორედ ამ ფილმზე გამოთქვამს. ძალიან, ძალიან ბევრი ელოდა, რომ ამ ფილმისთვის დიკაპრიო საუკეთესო მამაკაცის როლისთვის ოსკარს აიღებდა. მგონი, ეს ის სიტუაცია იყო, როდესაც თვითონ ლეონარდოც კი ფიქრობდა, რომ ოსკარი ხელში ჰქონდა. თუმცა აკადემიამ „არაოო“.

4 274